بداية الحمله الشبابيه المصريه الأولى للقضاء على الفن الهابط وشطب أحد رموزه من نقابة الموسيقيين تامر حسنى

بداية الحمله الشبابيه المصريه الأولى للقضاء على الفن الهابط وشطب أحد رموزه من نقابة الموسيقيين تامر حسنى





بسم الله الرحمن الرحيم


المكان : نقابة المحاميين بمدينة الزقازيق

الزمان : الساعه 2:30 ظهرا

الحدث : أول اجتماع لبدء أكبر حمله شبابيه مصريه ضد الفن الهابط وبدايتنا ضد تامر حسنى أحد رموز الفن الهابط

تفاصيل الحدث : القيام برفع دعوى قضائيه ضد نقيب الموسيقيين نظرا لعدم قيامه بشطب المطرب تامر حسنى من النقابه لأسباب غير معروفه مما يعد مخالفا للقانون

هنتكلم كده بإختصار وبدون ما نطول عليكم وباللهجه العاميه عشان الناس كلها هنا تفهم وتركز وتصحصح معانا

احنا ياجماعه هنبدأ حمله لشطب تامر من نقابة الموسيقيين .. ايه بقى اللى مخلينا داخلين بقلب جامد رغم ان كان فى احد المحاميين طالب بنفس الطلب قبلنا ،، أقولكوا أنا
دلوقتى احنا هيبقى عدد الشباب اللى فى الحمله كبير جدا والدعايه هتبقى مكثفه نت وصحافه ده أكيد وهنخاطب ان شاء الله برامج تليفزيونيه بعد وصول صوتنا للإعلام من خلال النت والصحافه .

ياجماعه احنا واخدين الموضوع جد اوى لأن مفيش اى ضرر او خساره على اى حد مننا او اى حد من الأعضاء هيشارك معانا من الموضوع ده
بالعكس احنا هنقوم الرأى العام عليه وهنوصل صوتنا للإعلام وده من خلال الإتفاق مع احد الجرائد الفنيه بدون ذكر اسماء دلوقتى وهى هتتولى معانا الحمله

( وبشكر كل الشكر السادة المحاميين المتطوعين بدون أى مصلحه من اى نوع للمشاركه معانا فى الحمله دى )

احنا مش عايزين نبقى سلبيين ويبقى كل هدفنا ننتقد انسان عن طريق النت والفيس بوك بس . .. احنا خدنا خطوه أكبر وبنقوم بيها

احنا مش هنحرق بالتفصيل اللى حصل فى الاجتماع بينا وبين الساده المحامين بس بإختصار تم مناقشه الآتى :

جمعنا كم كبير من المعلومات عن تاريخ تامر حسنى فى كل المجالات كفنان وكمواطن مصرى له حقوق وعليه واجبات

وجمعنا أرقام القضايا والمحاضر المدان فيها تامر حسنى ودرسنا كل جوانب القضيه
تمت مناقشه كل تفاصيل اقامه الدعوى القضائيه ضد نقيب الموسيقيين
حددنا هدفنا وهنبدأ ان شاء الله بدعايا مكثفه وتجميع أكبر عدد ممكن من الأعضاء هيكونوا معانا فى الحمله


عن أبى سعيد الخدرى رضى الله عنه قال : سمعت رسول الله صلى الله عليه وسلم يقول : ( من رأى منكم منكرا فليغيره بيده ، فإن لم يستطع فبلسانه ، فإن لم يستطع فبقلبه ، وذلك أضعف الإيمان ) .. صدق رسول الله صلى الله عليه وسلم


احنا فعلا مش هنقول شعارات ولا هنشتغل نفسنا ولا بندور على شهره احنا شايفين شيىء غلط وبإيدينا نحاول نصلحه أى نعم فى حاجه أهم من دى بكتير جدا بس ده اللى فى استطاعتنا نعمله

ممكن اى حد يقرا الكلام ده دلوقتى يقول انتوا بتحقدوا على تامر وبتاع وريحوا دماغكوا واللى مش بيحبه ميسمعوش .. أرد عليه وأقوله الحمله دى هتبقى ضد الفن الهابط سواء تامر أو غيره بس بدايتنا هتكون بـ تامر حسنى

ياجماعه احنا عددنا مش قليل احنا جروب كبير وده هيكون أحد الأسباب اللى هتخلى جهات الإعلام المختلفه تساندنا وتحس بينا وتقول فعلا فى شباب كتير اجتمعوا على تغيير حاجه سلبيه فى المجتمع

المطلوب من كل عضو بيقرا التوبيك ده حالا انه فعلا يكون جاد معانا فى الحمله ويبقى ايجابى احنا فعلا محتاجين عدد كبير من الناس
بكرر تانى مفيش اى ضرر من اى نوع على اى حد .. ده بالعكس يكفى انك فعلا تكون حسيت انك بتغير حاجه فى البلد للأحسن .. أكيد وانت بتقرا التوبيك زاد عندك الحماس انك تبقى معانا
ياريت فعلا اى حد هيشارك بجديه معانا يبعت لأى أدمين فى الجروب رساله ويقول أنا معاكم فى الحمله وهنتصل بيك ونكلمك ونقولك دورك ايه
برضه عشان ألفت نظركم لحاجة الموضوع ده مش هياخد حاجه من وقتك ولا هيعطلك عن اى حاجه
ياجماعه الموضوع لو مكنش يستاهل ولا كنا هنفكر فيه اصلا .. الموضوع اللى جمعنا فى الزقازيق بالرغم ان فينا ناس جت من بنها ومن شبين الكوم والعاشر من رمضان عشان تعمل حاجه يبقى ايه ؟!
...
فى النهايه بنشكر مره تانيه وتالته ورابعه الأستاذ أحمد محمد فريد اللى اتطوع معانا فى رفع الدعوى القضائيه بدون أى أتعاب محاماه وشكر خاص للأستاذ حسن والأستاذ محمود عوض المحاميين المشاركين معانا فى الحمله بدون اى مصلحه .
وشكر خاص للعضوه نادين صلاح اللى حمستنا اننا نقوم بالحمله دى

كلمه اخيره والله العظيم هدفنا من الموضوع ده كله نلاقى شباب بتحب مصر وخايفه عليها وتقول لا لأى حاجه غلط .. احنا هنقول لأ للفن الهابط بما ان فى ناس بتخاف من اى حاجه فيها سياسه فاحنا بعيدين كل البعد عن اى حوار سياسى والمحاميين اللى معانا لا ينتمون لأى حزب أيا كان
وبنشكر كل حد اهتم بس انه يقرا الموضوع ده .. ونقوله أتمنى تشاركنا بجد واتمنى اى حد هيرد على التوبيك انه يبعت رساله لأى ادمين ويقولنا أنا معاكم عشان بكره تامر وبكره الفن الهابط بجد هنفرح اوى .. وبكرر للمره العاشره اى حد هيبقى معانا مفيش اى ضرر عليه مهما كان .. واتمنى من شبابنا انه يقف معانا

ودى بعض الصور من الإجتماع

https://2img.net/h/oi40.tinypic.com/2wno750.jpg
-------
https://2img.net/h/oi39.tinypic.com/2n00gp1.jpg
-------
https://2img.net/h/oi40.tinypic.com/2prwj6g.jpg
-------
https://2img.net/h/oi43.tinypic.com/2qa2qf6.jpg